Hai ajeeb shehar ki zindagi na safar raha na qayaam hai
kahin karobaar si dopahar kahin bad-mizaaj si sham hai .!
kahin karobaar si dopahar kahin bad-mizaaj si sham hai .!
Yunhi roz milne ki aarzoo badi rakh rakhaaw ki guftugoo
ye sharaafaten nahin be-gharaz isey aap se koi kaam hai .!
Kahan ab duaaon ki barkaten woh naseehaten woh hidaayaten
ye matalbon ka khuloos hai ye zarooraton ka salaam hai .!
Woh dilon mein aag lagaayega main dilon ki aag bujhaunga
usey apne kaam se kaam hai mujhe apne kaam se kaam hai .!
Na udaas ho na malaal kar kisi baat ka na khyaal kar
kayi saal baad mile hain hum tere naam aaj ki shaam hai .!
Koi naghma dhoop ke gaanv sa koi naghma shaam ki chhaanv sa
zara in parindon se poochhna ye kalaam kis ka kalaam hai .!!