Ek karb-e musalsal ki saza den toh kise den
maqtal mein hain jeene ki dua den toh kise den .!
Patthar hain sabhi log karen baat toh kis se
is shehar-e khamoshan mein sada den toh kise den .!
Hai kaun ki jo khud ko hi jalta hua dekhe
sab haath hain kaaghaz ke diya den toh kise den .!
Sab log sawaali hain sabhi jism barahna
aur paas hai bas ek rida den toh kise den .!
Jab haath hi kat jaayen toh thaamega bhala kaun
ye soch rahe hain ki asaa den toh kise den .!
Baazar mein khushboo ke kharidaar kahan hain
ye phool hain berang bata den toh kise den .!
Chup rahne ki har shakhs kasam khaaye hue hai
hum zehar bhara jaam bhala den toh kise den .!!